Renommée-ում առանձնահատուկ է յուրաքանչյուր մանրուք. այստեղ էկլետիկ ոճի ինտերիերի բարձրաճաշակ լուծումները, մեղմ երաժշտական ֆոնը, զուսպ և հանգիստ մթնոլորտը հյուրի ուշադրությունն ու բոլոր զգայարանները կենտրոնացնում են միայն շեֆ-խոհարարի տաղանդի և ստեղծարարության շնորհիվ ստեղծված նոր համերի բացահայտման վրա։

Այստեղ հատուկ կարևորություն են ստանում այն մթերքները, որոնցից պատրաստվում է անսպասելի ու յուրօրինակ համադրություններով հեղինակային ուտեստը, մատուցվող լավագույն գինիների ընտրանին, սպասարկման յուրահատուկ ոճն ու անհատական մոտեցումը յուրաքանչյուր հյուրին:

Renommée-ն նախատեսված է 26 հյուրի համար և գործում է երեկոյան 18:00-ից: Անհրաժեշտ է նախապես ամրագրել սեղանը։

2025-ի գարունը Ռենոմեն սկսում է նոր հեղինակային սեթով, որը շեֆ-խորարար Կարեն Խաչատրյանն անվանել է «Հինգերորդ եղանակ»։

Շեֆ-խոհարարի համար Հայաստանի բնությունն ու մթերքների բազմազանությունը մշտապես եղել են ոգեշնչման աղբյուր։ Բնության մեջ նա գտնում է իր լավագույն մտքերն ու ներշնչանքը, իրական հանգստությունը, որոնք շատ կարևոր են խոհարարին ստեղծագործելու համար։ Նոր սեթում համադրված են գարնան զարթոնքը, ամռան արևը, աշնան հասունությունը և ձմռան հանգստությունը։

Այն Ռենոմեի հյուրերին խոստանում է փորձառություն, որտեղ հայկական համերի ճամփորդությունը դուրս է սահմաններից և համադրված է քիմքի համար անկանխատեսելի ու անսովոր զգացողություններով։