Դիլիջանի սնկերով ձվածեղ

Կարեն Խաչատրյանի համար Renommée-ի ուտեստների արարման ոգեշնչման աղբյուրը հայրենի երկրի բնությունն է, որի բարիքները նրա հրաշագործ ձեռքերում վերածվում են հույզերի, վառ հուշերի և պատմության։ 

Նոր համերի հետքերով հերթական ճանապարհորդությունը մեր խոհարարին հասցրեց Դիլիջան՝ Հայաստանի ամենաչքնաղ անկյուններից մեկը, սաղարթախիտ սոճուտներով, կանաչ անտառներով, մշակութային արժեքավոր ժառանգությամբ և, իհարկե, խոհարարական ավանդույթներով ու հարուստ պատմությամբ:

Դուք եղե՞լ եք Դիլիջանում, գիտե՞ք, որ տեղանքի ամենահայտնի ուտեստը Դիլիջանի ծառի սնկով ձվածեղն է, որն էլ մեր շեֆ-խոհարարին ոգեշնչել է իմպրովիզացիայի։ 

Ուտեստի հիմնական բաղադրիչները Դիլիջանի անտառներում աճող ծառի սնկերն ու տրյուֆելն են։ Դասական ուտեստն առավել հաճախ պատրաստում են անտառում խարույկի վրա։ Իսկ մեր շեֆի մեկնաբանությունը Ձեր ափսեում է։ 
Մատուցման ընթացքում զգացի՞ք անտառում վառած խարույկի ծխի բույրը։
 

Դիլիջանի տապակած ծառի սունկն ու սոխով 24 ժամ մարինացված սերուցքով, գինիով, դափնու տերևով, տրյուֆելի կրեմով  և պանրով պատրաստված սոուսը, որը հավկիթի հետ բարձր ջերմաստիճանում խառնելով՝ շեֆ խոհարարը ստացել է ձվածեղի համ և պահպանել կրեմային տեքստուրան։ Ուտեստը մատուցվում է տարտալետում, ձևավորված կարտոֆիլի չիփսերով ու Դիլիջանի տրյուֆելներով։ Այս ուտեստի մատուցման ընթացքն ու համը տեղափոխում են դիլիջանյան կանաչ անտառ, հիշեցնում  խարույկի ծխի և սնկով ձվածեղի անուշ բույրը։